ပရီးမီးယားလိဂ် ကလပ် ဖူလ်ဟမ် ကတော့ ရီးရဲလ်မက်ဒရစ် ကနေ တိုက်စစ်မှူး ဂွန်ဇာလို ဂါစီယာ ကို အခုတပတ်မှာပဲ တရားဝင် ခေါ်ယူထားနိုင်ခဲ့ပါတယ်။ ဒီအချိန်မှာ အသင်းရဲ့ နည်းပြ ဖြစ်သူ အဲလ်ဗာရို အာဘီလိုအာ ကတော့ သူ့ရဲ့ ကစားသမားဟောင်းကို တော်တော်လေး သဘောကျ နှစ်သက်နေကြောင်း ဖွင့်ဟ ပြောဆိုလာခဲ့ပါတယ်။
အာဘီလိုအာရဲ့ အဆိုအရ ဖူလ်ဟမ်ရဲ့ ကစားသမားသစ် ဂါစီယာဟာ “ကမ္ဘာ့အကောင်းဆုံး တိုက်စစ်မှူးတွေထဲက တစ်ဦး” ဖြစ်တယ်လို့ ဆိုလိုက်ပြီး အသင်းဆီ ရောက်ရှိလာခဲ့တာကို ဝမ်းမြောက် ဝမ်းသာ ကြိုဆိုခဲ့ပါတယ်။ အသက် ၂၂ နှစ် အရွယ် စပိန် တိုက်စစ်မှူး ဂါစီယာဟာ ပေါင် ၃၄ သန်း (ယူရို ၃၉.၇ သန်း) နဲ့ ရီးရဲလ်မက်ဒရစ်ကနေ ပြောင်းရွှေ့လာခဲ့တာ ဖြစ်ပါတယ်။ ဒါ့အပြင် ဂါစီယာဟာ ပရီးမီးယားလိဂ် ကလပ် ဖူလ်ဟမ်နဲ့ ၅ နှစ် စာချုပ် လက်မှတ်ရေးထိုးခဲ့ပါတယ်။ ဒါ့အပြင် ဖူလ်ဟမ် အသင်း ဘက်က သဘောတူရင်တော့ နောက်ထပ် ၁၂ လ အလိုအလျောက် သက်တမ်းတိုးနိုင်မယ့် အခွင့်အရေးလည်း ပါဝင်နေပါသေးတယ်။
လွန်ခဲ့တဲ့ ရာသီက ရီးရဲလ်မက်ဒရစ် အသင်းမှာ နည်းပြ ဇာဗီ အလွန်ဆိုရဲ့ နေရာကို အာဘီလိုအာ ဝင်ရောက် တာဝန်ယူခဲ့စဉ်ကတည်းက ဂါစီယာဟာ သူ့လက်အောက်မှာ ပါဝင်ကစားခဲ့သူ ဖြစ်ပါတယ်။ ဂါစီယာဟာ ၂၀၂၅-၂၆ ရာသီ ပြိုင်ပွဲစုံမှာ ရီးရဲလ် အတွက် ၈ ဂိုး သွင်းယူပေးခဲ့ပြီး ဖန်တီးမှု ၃ ကြိမ် ပြုလုပ်နိုင်ခဲ့ပါတယ်။ ရီးရဲလ် အသင်းနဲ့ အတူ ဆုဖလား အောင်မြင်မှု မရယူနိုင်ခဲ့ပေမယ့် ပြီးခဲ့တဲ့ နွေရာသီ ဖီဖာ ကလပ် ကမ္ဘာ့ဖလား ပြိုင်ပွဲ မှာတော့ ဂိုးသွင်း အများဆုံး ကစားသမား အဖြစ် သူ့ရဲ့ ထူးချွန်တဲ့ စွမ်းဆောင်ရည်တွေကို သက်သေပြနိုင်ခဲ့ပါတယ်။
အဆိုပါ ပြိုင်ပွဲမှာ ဂါစီယာဟာ ၄ ဂိုး အထိ သွင်းယူခဲ့ပြီး အိန်ဂျယ် ဒီမာရီယာ၊ ဆာဟူး ဂူရက်ဆီ၊ မားကော့စ် လီယိုနာဒို တို့နဲ့ အတူ ဂိုးသွင်းအများဆုံး စံချိန်ကို ပူးတွဲ ပိုင်ဆိုင်ခဲ့ပါတယ်။ ဒါ့အပြင် သွင်းဂိုးနဲ့ ဖန်တီးမှု စုစုပေါင်း ၅ ကြိမ် အထိ ပါဝင် ပတ်သက်နိုင်ခဲ့တာကြောင့် မိုက်ကယ် အိုလီဆေး၊ ကိုးလ် ပါးလ်မား တို့နဲ့ အတူ ပြိုင်ပွဲရဲ့ အကောင်းဆုံး စံချိန်ကို ရယူနိုင်ခဲ့တာပါ။
ဂါစီယာဟာ အာဘီလိုအာ ဖူလ်ဟမ် အသင်းကို ရောက်ရှိလာပြီးနောက် ပထမဆုံး ခေါ်ယူလိုက်တဲ့ ကစားသမား ဖြစ်ပြီး၊ နည်းပြ ဖြစ်သူကတော့ သူ့ရဲ့ တိုက်စစ်မှူးသစ်ကို ကွင်းတွင်းမှာ စတင် အသုံးပြုဖို့ စိတ်လှုပ်ရှားလို့နေပါတယ်။ “သူ့ဆီကနေ သွင်းဂိုးတွေ ရရှိလာမယ်လို့ မျှော်လင့်ပါတယ်။ ဒါတင် မကသေးပါဘူး၊ သွက်လက်တဲ့ အရှိန်ရှိတယ်၊ Skill ကောင်းတယ်၊ သန်မာတယ်၊ အလုပ်လုပ်နှုန်း ကောင်းသလို ဖိအားပေး ကစားနိုင်စွမ်းလည်း ရှိတယ်။ ဒါကြောင့်မို့လို့ ကျွန်တော့် အတွက်တော့ သူဟာ တောက်ပတဲ့ အနာဂတ်ကို ပိုင်ဆိုင်ထားတဲ့ ကမ္ဘာ့အကောင်းဆုံး တိုက်စစ်မှူးတွေထဲက တစ်ဦးပါပဲ။”
“သူ့ကို ခေါ်ယူချင်နေတဲ့ အသင်းတွေ အများကြီး ရှိခဲ့တာကို ကျွန်တော် သိပါတယ်။ ဒါပေမယ့် သူက ကျွန်တော်တို့ဆီ လာဖို့ ဆုံးဖြတ်ခဲ့တာကြောင့် ဝမ်းသာဂုဏ်ယူမိသလို သူ့ကို အသင်းမှာ ပိုင်ဆိုင်ခွင့်ရလို့လည်း တကယ်ပဲ ပျော်ရွှင်မိပါတယ်။” လို့ ဖူလ်ဟမ် နည်းပြ အာဘီလိုအာက ဆိုပါတယ်။
ဖူလ်ဟမ် အသင်းဟာ လာမယ့် ဩဂုတ်လ ၂၄ ရက်နေ့မှာတော့ နည်းပြဟောင်း ဇာဗီ အလွန်ဆို ကိုင်တွယ်နေတဲ့ မြို့ခံ ပြိုင်ဘက် ချဲလ်ဆီးနဲ့ ယှဉ်ပြိုင်ရင်း ရာသီသစ် ပရီးမီးယားလိဂ် ပွဲစဉ်တွေကို စတင်သွားရတော့မှာ ဖြစ်ပါတယ်။ ဒီမတိုင်ခင် မှာတော့ ဖူလ်ဟမ်က ဘွန်ဒက်စ်လီဂါ ကလပ် စတုဂတ်နဲ့ ရာသီကြို ခြေစမ်းပွဲ ကစားရဦးမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
